Ang mungo ay isang kilalang gulay na madalas kainin ng mga Pilipino lalo na tuwing Biyernes. Ang mga berdeng buto ang siyang karaniwang kinakain na gulay. Maliit lamang ang halaman nito na nababalot ng maliliit na buhok. Ang mga buto ay nakukuha mula sa mala-sitaw na bunga ng halaman. Maaari ding patubuan ng ugat ang mga buto upang maging toge (sprout).

– Ang mga buto ng mungo ay mayaman sa carbohydrate at protein. Maaari ding makuhanan ng calcium, iron, vitamins A at B.

Makatutulong ang pag-inom sa pinaglagaan ng mungo para mapanumbalik sa normal ang pag-ihi.

Maaaring inumin din ang pinaglagaan ng mungo para malunasan naman ang kondisyon ng pag-uubo.

Mabisa para sa kondisyon ng constipation o pagtitibi ang pagkain ng nilagang munggo.

Epektibong pamparami ng gatas ng nagpapasusong ina ang pag-inom sa sabaw ng nilagang mungo.

Ang iritasyon sa balat na dulot ng paglalagay ng kolorete sa mukha ay maaaring pahiran ng nilaga at dinikdik na buto ng munggo.